कक्षा १२को परीक्षामा नक्कली परीक्षार्थीलाई परीक्षामा सहभागी गराएको आरोपमा एक प्रिन्सिपल पक्राउ परेका छन् ।
काठमाडौंको धुम्बाराहीमा रहेको प्रोलिफिक सेकेन्डरी स्कुलका प्रिन्सिपल गोपालबहादुर महत कक्षा १२ को परीक्षामा नक्कली परीक्षार्थीलाई जाँच दिलाएको आशंकामा पक्राउ परेका हुन् ।
जिल्ला प्रहरी परिसर, काठमाडौंका अनुसार एक जना विद्यार्थीलाई नक्कली परीक्षार्थी बनाएको, प्रोलिफिक स्कुलमा कम्तिमा ४ जना नक्कली परीक्षार्थी रहेको आरोपमा उनलाई पक्राउ गरिएको छ ।
शिक्षा, विज्ञान तथा प्रविधि मन्त्रालयले ४ जनाको सिम्बोल नम्बरसहित छानबिन गर्न गृहमन्त्रालयलाई गत वैशाख १२ गते पत्राचार गरेको थियो ।
सचिव स्तरीय निर्णयले गृहलाई पत्राचार गरेपछि गरेको अनुसन्धानमा एउटा रजिष्ट्रेसन फर्ममा एक जनाको विवरण र एड्मिट कार्डमा अर्कैको फोटो राखेर जाँच दिलाए पाइएको जिल्ला प्रहरी कार्यालयले जानकारी दियो ।
प्रहरीका अनुसार दुई जना नक्कली परीक्षार्थी महतकै आफन्त हुन् । पक्राउ परेका महतलाई अहिले प्रहरी वृत्त, महाराजगञ्जमा अनुसन्धानका लागि राखिएको छ । ।
कक्षा १२ परीक्षा वैशाख १४ देखि सुरु भएको छ । भने २६ गतेसम्म सञ्चालन हुँदै छ ।
